Un segredo verde no ceo sobre o Penedo do Galo

Créditos da imaxe: Dani Caxete

Nas montañas o aire é máis puro e limpo. Respírase mellor, está máis fresco e o ceo amosa todo o seu esplendor. Ás veces pareces estar entre soños, cando as brétemas baixas e as nubes altas lle dan certo aire onírico. E aí tes subindo polo ceo unha nube de verdade, a nosa galaxia a Vía Láctea que divide a escena en dúas partes. Á esquerda tres astros máis brillantes, tres planetas neste aliñamento de hai un par de anos: Xúpiter, Marte e Venus. Por riba da cabeza do fotógrafo a típica familia estelar do inverno: a estrela máis brillante do ceo nocturno, Sirio, seguindo a Orión, ao Touro e ás Pléiades, ese fato de estrelas arriba á dereita. Aos pés o Penedo do Galo (Viveiro).

Luces de diferentes cores crean un espectáculo luminoso, vermello nos aeroxeradores, amarelo pola contaminación luminosa das vilas da mariña lucense, a propia lanterna do fotógrafo e o verde o ceo. Como? Un ceo verdecente? Non era a costa? Ese brillo verdeallo do medio da imaxe sobre o horizonte chámase luminescencia atmosférica, máis simple de dicir en inglés coa súa palabra airglow (literalmente, brillo do aire). Moi difícil de ver a simple vista porque é moi tenue e ten lugar só nas primeiras hora da noite. A súa orixe, a emisión de fotóns de cor verde por moléculas das capas altas da atmosfera ao recombinarse, despois de que durante o día a luz solar as disociase. Sobre todo moléculas con osíxeno.

A imaxe é unha panorámica de 6 fotos tomadas con 30 segundos de exposición e unidas dixitalmente, realizada por un artista con varias fotografías publicadas xa no Astronomical Pictura Of the Day da NASA. Ademais, adorna o mes de decembro do noso calendario para este ano 2018.

Poderías gostar de...

Eclipse de Lúa, eclipse de Sol

Van en parellas. Sabías? Hai uns días tivemos unha eclipse lunar total, o da foto. Dentro duns días teremos unha eclipse solar parcial. No primeiro,

O cangrexo foi o primeiro

Imaxinade que sodes un astrónomo na busca da fama. Daquela, polo século XVIII, o máis doado era atopar un cometa, publicalo e agardar a que

Procura

Subscríbete!

Ceos Galegos 2025

2 comentarios en “Un segredo verde no ceo sobre o Penedo do Galo”

Os comentarios están pechados.