Un raio vermello e un raio verde no solpor

Créditos: Dani Caxete

No mesmo solpor captouse un raio verde (incluso con detalles azulados) e un raio vermello. No mesmo lugar que o noso raio azul dos cantís de Loiba. Polo mesmo fotógrafo que deu a coñecer o lugar ao retratar o banco máis fermoso do mundo baixo un arco da Vía Láctea, imaxe que en case todos os lugares apareceu recurtada. O mesmo Sol que podemos ver cada día.

Un raio vermello e un raio verde. Un por baixo e outro por riba do Sol. Cuestión de xeometría e de comprender como se refracta a luz branca solar ao pasar pola nosa atmosfera. Pola parte superior nos chegan directamente as partes da luz solar con menor lonxitude de onda e da parte inferior as que teñen maior. Os seus camiños son diferentes, o de arriba amosa maior refracción que o inferior.

Ver un raio verde é difícil, pero relativamente sinxelo. Ver un raio vermello é raro, moi raro. Pero non chama tanto a atención porque destaca menos nun Sol a miúdo avermellado pola parte inferior ao poñerse. Ser quen de captar no mesmo solpor, o mesmo día, só cuns minutos de diferencia ámbolos dous xa leva de novo o tema ao carácter de extremadamente raro. Tamén pode darse o caso de que se vexa na Lúa, pois a luz é a mesma.

Esta primicia aínda sen publicar era tirada a víspera da eclipse solar do ano 2017, que no país só foi parcial. Foi o 20 de agosto, dende os cantís de Loiba (Ortigueira). Foron tomadas empregando un telescopio de 550 mm cunha lente barlow x2 e unha cámara Full frame acoplada. Son dúas imaxes superpostas que pertenecen a un vídeo secuencia aínda en proceso de elaboración por Dani Caxete. Dado o artístico das súas propostas, seguro que engaiola.

Charla: o editor de Ceos Galegos en Compostela, na Nave de Vidán, venres 2 de febreiro ás 21:00 horas “Un ano de astronomía en imaxes da NASA“, con observación astronómica ao rematar.

Poderías gostar de...

Marchou o Alfredo

Pasou hai uns días, pero foi para sempre. Forma parte da media ducia de colaboradores grazas aos cales puidemos iniciar este proxecto no outono de

Eclipse de Lúa, eclipse de Sol

Van en parellas. Sabías? Hai uns días tivemos unha eclipse lunar total, o da foto. Dentro duns días teremos unha eclipse solar parcial. No primeiro,

Procura

Subscríbete!

Ceos Galegos 2025

4 comentarios en “Un raio vermello e un raio verde no solpor”

Os comentarios están pechados.