Ceos Galegos > AstroDidáctica > Aí traballan tres persoas

Aí traballan tres persoas

Créditos do vídeo: Ángel D. R. Arós

Pasando por diante da Lúa pasa a fume de carozo o lugar de traballo actual de tres astronautas. Si, aí hai xente traballando. De feito, hai máis dunha década que a Estación Espacial Internacional está habitada permanentemente por tripulacións internacionais que se suceden sen interrupción. Xirando en menos dunha hora ao redor da Terra a unha altura media duns 400 quilómetros, a miúdo pasa por diante doutros astros como o Sol ou a Lúa.

Algúns astrofotógrafos aproveitan eses pasos ou tránsitos para retratar esta nave espacial. Aínda que como neste caso as efemérides indicaran que o lugar máis idóneo estaba entre Buño (Malpica de Bergantiños) e Carballo (A Coruña), a unha hora tan ingrata como as 5:57 da madrugada do sábado ao domingo e cunha previsión meteorolóxica bastante inestable. O noso astrofotógrafo empregou neste caso dous telescopios en paralelo para garantir o éxito da captura do vídeo. Iso si, 5 minutos despois, sen poder verificar in situ se tivera éxito na caza, tivo que recoller todo ás présas pois unha fronte de nubes pechou o ceo e comezou a chover a cachón. A recompensa foi boa desta volta; os dous equipos rexistraron o paso da Estación Espacial por diante da Lúa. O que vemos realmente é a sombra da estación, porque aquí non reflicte a luz solar senón que “eclipsa” a luz que recibimos nós da Lúa.

Para quen gustedes dos datos técnicos, este foi o instrumentral empregado: un telescopio Newton con focal de 1000 mm, ocular de 13 mm e sobre el a cámara Sony ILCE-7S; xunto cun refractor LongPerng ED66 de 400 mm, mulitplicador Canon 2X e cámara Canon EOS 6D a foco primario.

Seica o autor se auto-premiou cun chocolate con churros ao chegar a casa trala excursión antes de se deitar un pouco.

Poderías gostar de...

3 Respostas

  1. Os dous vídeos están delongados á metade da súa velocidade. En realidade, o paso da Estación Espacial polo disco lunar lévalle só pouco máis dun segundo. Outra proba da dificultade técnica do asunto.

  1. 7 Marzo, 2018

    […] solares reflicten a luz solar. Tamén hai veces que pasa por diante de astros singulares, como da Lúa, dando a posibilidade de tirarlle fotos e vídeos. Ou, como neste caso, por diante do Sol. Cunha […]

  2. 6 Marzo, 2020

    […] Un fotógrafo, unha nave espacial e a noite. Non se precisa máis para obter unha fermosa estampa do ceo estrelado. Ou si: dous satélites, un natural e outro artificial, e un planeta, a Terra. O autor tivo a paciencia de deixar aberto o diafragma da súa cámara uns catro minutos. Así, colleu o paso da Estación Espacial Internacional polo ceo galego de cabo a rabo. Por contra, a Lúa apareceulle sobreexposta, demasiada luz solar que saturou o sensor electrónico saíndo moi brillante. Porque é grazas a luz do sol reflectida na Lúa que podemos contemplala pola noite. A mesma luz reflectida nos paneis solares e na estrutura metálica que nos permite enxergar o satélite artificial. […]

Deixar unha resposta

A %d blogueros les gusta esto: