Se che gusta a astronomía, independemente do nivel que teñas. Se che atrae a carreira espacial. Se che atrae a fotografía. Se gustas da divulgación científica. Se queres pasar un fin de semana interesante nun contorno didáctico e estimulante. Se (só tes que verificar algunha opción):

• queres comezar a iniciarte na astronomía
• es un astrónomo afeccionado
• gustas da fotografía e queres saber de astrofotografía
• fas divulgación e queres coñecer técnicas profesionais
• tes curiosidade polo mundo que che rodea
• pertences ou queres pertencer a unha asociación de astrónomos afeccionados

Tes que estar en AstroGalicia 2018. Tanto se te queres inscribir para asistir a todas as actividades como se queres vir puntualmente ás charlas (de balde) ou outras actividades de asistencia libre. Podes ampliar a información da actividade e:

• consultar  o programa completo para os horarios das actividades
• mirar os contidos das charlas divulgativas (todas de acceso libre)
• comprobar se hai obradoiros que che poidan interesar (necesitan inscrición)
• pequenas biografías dos relatores e docentes
• inscribirte xa, antes de que remate o prazo o 8 de outubro. Recibirás por correo electrónico instrucións para o pagamento.
• como chegar e onde durmir (incluíndo opción de balde)

Falaremos de vida marciana, os últimos descubrimentos na vía láctea, a relación entre arte e astronomía, realización de maquetas de foguetes espaciais con motores e combustible sólido, como fotografar planetas, aprender as bases da astronomía, ceas temáticas, observacións nocturnas, mirar por telescopios moi diferentes… e todo no contorno do Parque Náutico de Castrelo onde grazas á colaboración do concello de Castrelo de Miño teremos o alumeado público apagado pola noite.