Unha lúa avermellada

Créditos da imaxe: Ángel D. R. Arós

Nesta madrugada a nosa Lúa atravesará o cono de sombra que a Terra proxecta no universo. A lúa chea mudará a súa cor branco cincento en vermello, xa que a atmosfera terrestre filtra e refracta a luz do Sol, no momento da totalidade. O proceso de refracción da luz provoca que sexan os tons avermellados os que se dirixen á Lúa, nun fenómeno semellante ao que provoca a coloración dos solpores terrestres. Ao final escurecerá de todo, ao carecer de luz. E voltará a repetirse a secuencia a inversa.

As eclipses de Lúa, pola súa frecuencia e extensión, pódense ollar case cada ano desde medio planeta. As efemérides son tan precisas como os cálculos da mecánica celeste o permiten, deixando de ser un misterio hai xa séculos. Co que non podemos loitar aínda é cunha meteoroloxía adversa como a que, neste caso, parece que imos sufrir.

Así, no noso país a eclipse ocorrerá entre as 4:34 e 7:51, na madrugada que vai do domingo 20 ao luns 21 de xaneiro. A fase da totalidade, a máis salientable, será entre 5:41 e 6:43, sendo ás 6:12 o punto de aliñamento perfecto do sistema Lúa-Terra-Sol. Nese intre a Lúa erguerase algo máis de 29º por riba do horizonte.

Observar unha eclipse de Lúa é completamente seguro sen ningún tipo de instrumento especial (ao contrario do que pasa coas eclipses solares). Aínda así, estar nun lugar preto e adaptar os nosos ollos á escuridade (evitando mirar farolas e pantallas electrónicas, por exemplo) axudará a gozar do mesmo. E varias asociacións e agrupacións de amadores da astronomía realizarán eventos públicos por todo o país. Polo momento temos constancia destas:

• Na Coruña, no parque de Eirís, a Agrupación Astronómica Coruñesa Ío realizará un evento público.

A anterior eclipse que puidemos gozar tivo lugar o pasado 27 de xullo. Aínda que tamén as nubes dificultaron a súa contemplación en moitos lugares, o feito de ser en fin de semana favoreceu a súa persecución buscando sitios despexados. Así foi como o autor da nosa imaxe conseguiu retratar á lúa vermella desde terras de Lemos.

Moito menos interesante, na noite do 16 ao 17 de xullo ocorrerá unha eclipse parcial de Lúa. Seguro que con mellor meteoroloxía.