Hoxe é Pascua; ou debera

Créditos da imaxe: Fins Eirexas

No calendario eclesiástico márcase o domingo de Pascua como o primeiro que hai despois da primeira Lúa chea que segue ao equinoccio de primavera. E a terceira Lúa chea do ano, a do xoves pasado, foi a primeira da primavera. Por pouquiño, porque o equinoccio (definido astronomicamente como o intre no que a Sol se sitúa no plano ecuatorial terrestre) tivo lugar ás 22:58 do pasado 20 de marzo e a Lúa chea (definida como o intre no que os astros Lúa-Terra-Sol están perfectamente aliñados e nesa orde) foi unhas horas máis tarde, na madrugada do 21 de marzo ás 02:43.

As reglas eclesiásticas actuais fixáronse coa reforma do calendario gregoriano feita polo Papa Gregorio XIII no ano 1582. Aí se daban as instrucións para marcar a Pascua e o resto de celebracións principais. Pero a pesares de contar co seu propio observatorio astronómico para estas medicións, as reglas eclesiásticas decidiron fixar tamén de xeito arbitrario que a primavera comezara o 21 de marzo. Deste xeito tamén carece de relevancia o momento astronómico das lúas cheas, sendo usado o concepto de “lúa chea eclesiástica” nun ciclo fixo. Por tanto a Pascua estará sempre entre o 22 de marzo e o 25 de abril. Porén, astronomicamente o comezo da primavera pode variar entre o día 19 de marzo (asi será dentro de 30 anos) e o 21.

Esa reforma foi a mesma que se comeu 11 días do calendario xuliano, o vixente ata o daquela nos países católicos, e que se publicou na bula Inter Gravissimas.

A comezos do século XX apareceu a proposta de fixar a Pascua. Incluso no concilio Vaticano Segundo, en 1963, acordouse chegar a un consenso con outras igrexas cristiáns, sendo o segundo domingo de abril o día con máis posibilidades. Pero non se volveu falar do tema. Así que a Pascua seguirá sendo variable, sen estar completamente suxeita ás medidas astronómicas, senón as curiosas regras eclesiásticas. E hoxe non é o domingo de Pascua, como lle tocaba. Este ano de 2019 será o 21 de abril, dous días despois da seguinte lúa chea, a segunda da primavera, pero a primeira lúa chea eclesiástica.E xa que hoxe non é Pascua esta tampouco é unha Lúa chea. En realidade tirouse o día anterior, o 20 de marzo, para poder contar coa iluminación das últimas horas de luz solar sobre a fachada da catedral de Santiago de Compostela. A imaxe foi tomada desde case 2 km de distancia, mediante un teleobxectivo acoplado á cámara Nikon D700 do autor.