Se onte foi lúa chea mañá será Pascua

Créditos da imaxe: Miguel Sánchez Varela

As vacacións de Semana Santa fluctúan de ano en ano debido á súa orixe astronómica. En xeral, a Pascua correspóndese co primeiro domingo que segue á primeira lúa chea da primavera. Tocáballe hai un mes, pero no ámbito eclesiástico contan as lúas de xeito un tanto particular.

A lúa chea implica mareas vivas, ao igual que a lúa nova. A atracción gravitacional do noso satélite mailo Sol actúan en conxunto ou en oposición provocando máximos de atracción, o que afecta aos grandes volumes de auga libre dos océanos en forma de mareas. O contrario ocorre nos casos onde ámbolos dous astros están en ángulo recto, nos cuartos crecente e minguante lunares. A súa acción conxunta contraponse dando lugar ás mareas mortas ou o punto máis baixo do devalo.

Porén, os días de lúa chea son os peores para a observación astronómica. A observación do satélite ten pouco interese porque está plano, sen contrastes, sen luces e sombras. A luz solar impacta desde o alto e dificulta albiscar cráteres, montañas, vales e o resto da xeografía lunar. Aquí temos a imaxe do sexto día do mes lunar, onde esta estaba alumeada ao 39%. A orientación da imaxe correspóndese co norte á esquerda e o leste arriba. Na parte inferior da imaxe aínda non chegou a luz solar, polo que nese límite denominado terminador os contrastes son máis acusados. A cantidade de detalles interesantes é enorme. Por citar un, no interior do cráter superior, Posidonious, apreciamos máis cráteres pequenos. Reciben os nomes de Posidonius A e B. É pouco fondo; o seu interior encheuse por fluxos de lava no pasado. Aínda así presenta un sistema de gretas denominado Rimae Posidonius. Á dereita deste cráter, a uns poucos centos de quilómetros e xa fóra do cadro, chegaríamos o lugar da primeira aterraxe humana, a Apollo XI.

A imaxe tirada desde terras do queixo foi creada a partires do amoreado do 25% dos fotogramas dun vídeo de 3 minutos. O equipo formado por un telescopio Orión Maksutov-Newton 190/1000 sobre unha montura NEQ6 Pro II ao que se lle acoplou unha cámara QHY5II Mono.

Poderías gostar de...

O cangrexo foi o primeiro

Imaxinade que sodes un astrónomo na busca da fama. Daquela, polo século XVIII, o máis doado era atopar un cometa, publicalo e agardar a que

Ás voltas co ceo estrelecido

Imaxinades ter ollos que foxen quen de rexistrar a luz que lles chega durante minutos? Pola noite descubrirïamos que o ceo xira ao redor das

Flores no ceo, flores na terra

Vistes as flores celestes? Máis ben son as flores cósmicas. Aí, no medio desa nube que se estrica en diagonal pola imaxe, semellan caraveis rosas.

Procura

Subscríbete!

Ceos Galegos 2025

1 comentario en “Se onte foi lúa chea mañá será Pascua”

Os comentarios están pechados.