Nubes arrepiantes

Créditos da imaxe: Lucía Candal

Vai chover! Pois non. 

As aparencias e as tradicións ás veces enganan. Este tipo de formacións nubosas non teñen que indicar que vaia caer unha boa chuvia. Realmente, falan dun equilibrio nas correntes entre o exterior e o interior da nube. Deste xeito, os aires ascendentes e cálidos foron pulindo a formación nubosa con aire frío que pretende descender. A loita entre esas correntes vai formando as estruturas alternas cóncavas e convexas, esas formas de mamas, que lle dan o apelido.

Aínda que ás veces reciben o nome xenérico de nubes mammatus, en realidade o nome desta nube é altostratus, sendo mamma unha das posibles variantes especiais. Así se recolle no Atlas Internacional de Nubes editado pola WMO ou Organización Meteorolóxica Mundial.

A nube cobre gran parte do ceo e, neste caso non opaca ao sol porque este está moi baixo no horizonte. E así provoca ese xogo de luces e sombras nas liñas de mamas que provocan o efecto arrepiante.A formación destas estruturas de mammas é complexa e aínda está en estudo. Parece que hai dous mecanismos principais, que poden actuar por xunto ou separado. En primeiro lugar é preciso que haxa inestabilidade na base da nube;  a existencia de aire seco favorece a súa formación. En segundo lugar, os contrastes entre as temperaturas da base da nube e a troposfera inferior seca xera desestabilizacións no aire da nube e produce capas mesturadas, aparecendo as mammas nas correntes descendentes de lóbulos flotantes de aire seco do interior da nube.