Rosalía é unha estrela

Créditos da imaxe: Pablo Martínez Alemparte

No ceo hai millóns de millóns de estrelas. A simple vista podemos albiscar unhas 4 500 desde ceos escuros. Nesta imaxe, tomada con longa exposición, aparecen moitas que non dariamos visto sen prismáticos. Unha delas é especial: a estrela Rosalíadecastro. Pertence aos poucos centos de estrelas que teñen nome de seu. A International Astronomical Union (IAU) é a única entidade que pode asignar nomes a obxectos astronómicos e así o estableceu no pasado mes de decembo.

O ano 2019, coincidindo co seu centenario, a IAU asignou a 112 países do planeta Terra unha estrela sen nome para ser baptizada. As estrelas tiñan unha característica común, un exoplaneta coñecido. Polo tanto hai a posibilidade de que no futuro se atopen máis exoplanetas, que tamén deberán ser baptizados con nomes relacionados co da súa estrela principal. Recibíronse unhas 360 000 propostas de nomes. Durante o periodo de votación popular participaron máis de 420 000 persoas. Non está mal para ser a segunda ocasión en que se realiza semellante campaña de participación popular.

A España tocoulle escoller o nome para a estrela HD 149143 mailo seu exoplaneta HD 149143 b. A estrela xa fora descuberta a principios do século pasado, grazas ao traballo de pioneiras da astronomía coma Annie Jump Cannon. No ceo podemos atopala na constelación de Ofiúco e moi preto do bordo coa constelación de Hércules. E o nome gañador foi o doutra muller, neste caso galega, Rosalíadecastro. Foi a atinada proposta dos promotores a Agrupación Astronómica Ío e un éxito para todos os que apoiamos a iniciativa. Entre os 20 nomes que o comité español recibiu como posibles o noso obtivo o 40% dos votos totais, 34 000 votos.

Queres ver á estrela Rosalíadecastro? Precisarás duns prismáticos ou un pequeno telescopio. Ou ben podes buscala na edición deste ano de #CeosGalegos20 #GalicienSkies20 porque, aínda antes de saber o resultado da iniciativa, deuse a casualidade de que en dúas das imaxes do noso calentario tiñamos a que había de resultar única estrela galega no ceo. Hai unhas semanas xa publicáramos unha delas tirada no castro de Baroña. Desta volta, un primeiro plano realizado desde a zona de Trevinca no concello ourensán da Veiga. O autor empregou unha cámara réflex Sony A6000 cun obxectivo Vivitar 28/70 – 3.5, un tempo de exposición de 2 minutos e sensibilidade ISO 1600.

Poderías gostar de...

Un cometa sobre a catedral?

As apariencias enganan, unha vez máis. A imaxe parece amosar un cometa sobre a catedral de Santiago de Compostela cunha atmosfera postapocalíptica con esa cor

Oito minutos de meteoro

Iso foi o que captou o noso colaborador. Na choiva de meteoros das xemínidas destes días pasaron oitos minutos entre a primeira imaxe e a

Un billón de estrelas

En realidade, nesta imaxe hai moitas máis. Ese é o número de estrelas estimado para a galaxia de Andrómeda, que enche a foto. A veciña

Procura

Subscríbete!

Ceos Galegos 2024

1 comentario en “Rosalía é unha estrela”

  1. Hola. Muchas felicidades para esta estela por partida doble, pues tiene nombre de mujer poeta y además esta poeta es galega…? Besos. ?

Os comentarios están pechados.