A bolboreta cósmica

Share on facebook
Share on twitter
Share on linkedin
Share on whatsapp
Share on telegram

Créditos da imaxe: Miguel Sánchez Varela

Unha bolboreta. Bate as ás na China e provoca un tornado en Kansas. Algo así dicía Edward Lorenz como metáfora da teoría do caos. Unha pequena variación nos parámetros iniciais dun modelo preditivo para a meteoroloxía, por exemplo, pode ter efectos enormes ao cabo do tempo.

Nos ceos galegos a nosa bolboreta ten un tamaño cósmico. Aí está na imaxe, dúas enormes ás de po cósmico e hidróxeno afastadas polo corpo, unha franxa escura. O seu nome técnico é o de IC 1318, aínda que popularmente recibe o nome de nebulosa Bolboreta. Está a unha distancia de 2 000 anos luz e a súa envergadura chega aos 50 anos luz.

Pero o que máis destaca é o brillo dunha estrela da constelación do Cisne (Cygnus) ou Cruz do Norte. Ten nome de seu, Sadr, que significa “peito”. Así está no medio da constelación, marcando o peito do cisne como a segunda estrela máis brillante do mesmo. Ten unha masa equivalente a unha ducia de soles e loce unhas 60 000 veces máis cá nosa estrela. Á súa esquerda aparece un grupo de estrelas amoreadas nun cúmulo aberto denominado NGC 6910. Son estrelas de pouca idade e andan a unha distancia de case 4 000 anos luz.A imaxe requeriu a combinación de 36 tomas de 10 minutos cada unha, empregando un filtro de hidróxeno alfa para salientar este gas. O equipo habitual deste autor, unha cámara dixital Canon 550D acoplada ao telescopio refractor de 80 mm en Arzúa (A Coruña).

Share on facebook
Share on twitter
Share on linkedin
Share on whatsapp
Share on telegram

Poderías gostar de...

Xa é primavera nos Ceos Galegos

Xa chegou a primavera ao hemisferio norte, o outono ao hemisferio sur. O equinoccio da primavera é un evento astronómico preciso que acontece ás 22:24

Un Sol con forma de estrela

Nalgunhas fotos o Sol parece unha estrela. Porque é unha estrela. De feito, os anglosaxóns aplícanlle un nome un tanto reiterativo: “sunstar” ou “sunburst”. Estamos

Forzas do ar, terra, mar e lume

Disque nesa pedrafita conflúen todas as forzas do Cosmos. Eis o fito de nome Marco do Vento, sen dúbida moi acaído. O lugar é senlleiro;

Procura

Subscríbete!

Ceos Galegos 2023