Gala anual premios Ceos Galegos 2020

A nosa gala anual para entregar os premios ás mellores imaxes do ano 2020 vai ser no día das Letras, o 17 de maio de 2021 ás 12:00 horas. O evento será conducido por Manu Vicente, director do programa Efervesciencia da Radio Galega, e por X. Dosi Veiga, editor do noso proxecto. A ambientación musical correrá a cargo de Juan Vázquez, que interpreterá diversos temas á guitarra eléctrica. E todo será ao aire libre, na terraza do Náutico de Castrelo, un dos nosos patrocinadores.

Durante a gala entregaremos os premios da votación popular que xa coñecemos. Pero tamén terá o seu puntiño de emoción, pois desvelaremos o resultado do xurado. Asistirán todos/as os/as fotógrafos/as premiados, pero non saben en que posición quedaron. Ademais, todo o público poderá participar no xogo de adiviñar a votación do xurado. Os que máis puntos consigan recibirán un lote de regalos ao final da gala.

Se queres asistir como público é de balde pero convén que reserves chamando ao propio Náutico de Castrelo ou enviándonos un correo a nós. Se queres quedar ao xantar tamén é preciso reservares. E lembra que deberás cumprir en todo momento as indicacións con motivo de prevención da COVID19. Por exemplo, levar a máscara posta en todo momento.

O concurso para a escolla das mellores imaxes de 2020 foi posible grazas á colaboración económica das asociacións amigas do noso proxecto: Divulgacción – Asociación Galega de Comunicación de Cultura Científica e Tecnolóxica (que patrocinou a categoría “didáctica/creativa”),. o Clube Compostelán Vega, a Asociación Astronómica Sirio de Pontevedra, AstroVigo, a Agrupación Astronómica Coruñesa Ío maila Agrupación Astronómica Rías Baixas.

Os libros e láminas para lotes de regalos son posibles grazas ás donacións de Aira Editorial, Alvarellos Editora, librarías Punto e Coma, Editorial Hugin e Mugin, Urco Editora mailo Consello da Cultura Galega, ademais das contribucións de Museo Etnolóxico de Ribadavia e os Museos Científicos Coruñeses. O contrapunto musical corre a cargo dos regalos de Nigra Mors e Manuel Carballo.

E os lotes tamén levan a súa parte de alimento para o corpo, grazas ás donacións dos amigos de Denominación de Orixe Ribeiro e a Denominación de Orixe Arzúa-Ulloa; o único queixo galego con forma de lúa chea.