Ceos Galegos20: premios do xurado “paisaxes celestes”

Primeiro Premio

Macizo de Trevinca con luz de Lúa de Óscar Blanco. Non hai máis que admirar a imaxe a toda pantalla para concordar co xurado ao afirmar que se trata dunha “composición de cadro acertada, (…) tonos casí oníricos en neve e ceo. A neve no primeiro plano axuda a transmitir o frío do ceo de inverno”. Un lugar sen contaminación luminosa no que o propio luar aporta a luz necesaria. Incluso se albisca á constelación de Orión por riba é á esquerda das árbores, así como as Pléiades, un grupiño de estrelas á dereita do centro da imaxe.

A imaxe tirouse na noite de reis de 2021 e precisou de 13 segundos cunha ISO 3200.

O autor recibiu un lote de regalos: un queixo grande da Denominación de Orixe Arzúa-Ulloa, un lote de libros de Urco Editora, unha lámina fermosa de Librerías Punto e Coma, un lote de libros do Consello da Cultura Galega, unhas fermosas postais históricas de Alvarellos Editora e un fermoso “Unha noite no tren da Vía Láctea” de  Aira Editorial. Ademais, un premio económica grazas ás entidades patrocinadoras: Divulgacción, Clube Vega, Asociación Astronómica Sirio de Pontevedra, AstroVigo, Agrupación Astronómica Coruñesa Ío, Agrupación Astronómica Rías Baixas. 

Segundo Premio

Ardora de Drew Korme. Un dos fenómenos do ano 2020, o mar de Ardora que durante varias noites se puido admirar na praia de Carnota, aprezada polo xurado neste premio. “A fotoluminiscencia do mar, unha non demasiado intrusiva contaminación luminosa e o toque do trípode do fotógrafo na praia coa luz vermella”. Tamén tivo en conta “ese contraste de tonalidades, entre o frío da bioluminiscencia e o cálido da contaminación lumínica dos núcleos de poboación”, ademais do “bo xogo das coloracións do mar de ardora, a imagen da Via Láctea da que parecen saír estrelas, e o resplandor do horizonte”.

Como durante todo o ano, os planetas Saturno e Xúpiter á esquerda da Vía Láctea, camiño da súa conxunción ao final do ano.

O autor recibiu un lote de regalos: un queixo de tamaño medio da Denominación de Orixe Arzúa-Ulloa, un lote de libros de Urco Editora, unha lámina fermosa de Librerías Punto e Coma, un lote de libros do Consello da Cultura Galega e un fermoso “Vidas Imaxinarias” de  Aira Editorial.

Terceiro Premio

Aleixandrus por “Unha cúpula nocturna”. Xuntar unha paisaxe coñecida e senlleira, un ceo fermoso e un bo procesado non son sempre garantía de éxito, pero axuda moito. Así, esta “imaxe respira naturalidade tanto na luz e a cor da parte terrestre como na celeste. A Vía Láctea sen sobreprocesar respectando os tons do centro galáctico e dos brazos, mantendo a proporcionalidade no tamaño das estrelas que permite recoñecer algunhas constelacións.

As formación xeolóxicas en primeiro plano, así como o canón do Sil, danlle unha fondura de campo á imaxe moi acaída. No ceo, o arco da Vía Láctea enmarca á galaxa de Andrómeda, ese borronciño da esquerda, e aos planetas Saturno e Xúpiter na dereita.

O autor recibirá un lote de regalos: varios libros de Urco Editora, unha lámina fermosa de Librerías Punto e Coma, un lote de libros do Consello da Cultura Galega, da Editorial Hugin e Mugin e de  Alvarellos Editora.

Ademais, os/as premiados/as puideron gozar do viños da Denominación de Orixe Ribeiro no xantar ofrecido polo Náutico de Castrelo, ademais de exemplares adicionais de Museo Etnolóxico de Ribadavia, dos Museos Científicos Coruñeses e CD de música de Nigra Mors.