Soño de noite de verán, premio do público 2021

Share on facebook
Share on twitter
Share on linkedin
Share on whatsapp
Share on telegram

Nunha arca gardamos as cousas de valor. A moura que construíu esta arca de pedra ben puido estar pensando en gardar dentro o Universo. Máis a tampa moveuse e pola boca saiu un carreiro de estrelas que formou a Vía Láctea. Di a lenda que a moura carrexou as pedras na cabeza pois estaba dando de mamar a un cativo. Nós completamos a lenda para darlle forma á intención da autora da imaxe, captar a Vía Láctea saíndo desde o Dolmen da Pedra da Arca (Malpica de Bergantiños, A Coruña). Se pensamos que na mitoloxía grega a Vía Láctea formouse polo leite derramado cando Heracles se soltou do peito de Hera, o paralelismo está claro.

A nosa reinterpretación da lenda é inventada, como tamén é inventado que o camiño das estrelas leva aos peregrinos a Santiago de Compostela. Porén esta afirmación así aparece recollida no Códice Calixtino.

Verdades ou mentiras. Contos, lendas ou ciencia. O que si sabemos é que todas esas estrelas do ceo pertencen á nosa galaxia, o mesmiño que o noso Sol. O mesmiño que a Lúa que comeza a se agochar pola dereita. O mesmo que as estrelas que, por riba do dolmen e a rentes do horizonte, forman a constelación do Escorpión. Cortando o cumio dos eucaliptos está a zona central da Vía Láctea. Mesmo ampliando a imaxe albiscamos algunha nebulosa en tons violáceos, lugares nos que se están a formar estrelas.

A fermosa panorámica composta a partires de 6 imaxes valeulle á Soraya Sampedro ser escollida polo público do noso concurso de mellores imaxes do ano 2021, na categoría de “Xente e Ceo”. Parte do mérito correspóndelle aos nosos antergos, quen nalgún momento do terceiro milenio antes da nosa era decidiron construír este monumento funerario.

Share on facebook
Share on twitter
Share on linkedin
Share on whatsapp
Share on telegram

Poderías gostar de...

Xa é primavera nos Ceos Galegos

Xa chegou a primavera ao hemisferio norte, o outono ao hemisferio sur. O equinoccio da primavera é un evento astronómico preciso que acontece ás 22:24

Un Sol con forma de estrela

Nalgunhas fotos o Sol parece unha estrela. Porque é unha estrela. De feito, os anglosaxóns aplícanlle un nome un tanto reiterativo: “sunstar” ou “sunburst”. Estamos

Forzas do ar, terra, mar e lume

Disque nesa pedrafita conflúen todas as forzas do Cosmos. Eis o fito de nome Marco do Vento, sen dúbida moi acaído. O lugar é senlleiro;

Procura

Subscríbete!

Ceos Galegos 2023