Por diante do xigante

Os catro satélites principais de Xúpiter receben nomes relacionados na mitoloxía co deus máis importante do Olimpo grego, Zeus, o equivalente á denominación romana. Son Ío, Ganímedes, Europa e Calixto. Como xiran ao redor do planeta máis ou menos no mesmo plano no que este e a Terra orbitan ao redor do Sol, continuamente perdémoslle a pista cando pasan por tras ou por diante. Con pequenos telescopios somos quen de ver a sombra que proxectan cando transitan por diante. E así aparece nesta detallada imaxe.
No cadrante superior dereito hai un sombra redondeada e escura, correspondente ao paso do satélite Ío por diante de Xúpiter.
As franxas anubradas de diferentes cores amosan a tumultosa dinámica da atmosfera do xigante gasoso. Destaca a Gran Mancha Vermella, un enorme ciclón que aumenta ou diminúe de tamaño pero que xa dura varios séculos. Ten o diámetro de dúas terras e ventos de ata 400 km/h.