A nebulosa da Media Lúa

A estrela WR136 non desapareceu. Pertence a un tipo de estrelas moi estrañas denominadas Wolf-Rayet. Son estrelas moi masivas, con vidas moi frenéticas e tempestuosas e que adoitan morrer antes ca outras máis pequenas. A WR136 naceu cunha masa unhas 25 veces a do sol, pero cada 10 000 anos expulsa ao espazo o material equivalente a unha masa solar. Agora, xa nunha fase vital avanzada, pertence ao tipo das xigantes vermellas. Nuns anos, nun cento de milleiros de anos en concreto, agárdase que estoupe en forma de supernova se aínda lle queda daquela masa abondo.

A nebulosa formada na imaxe recibe o alcume “nebulosa do Crecente ou da Media Lúa”, pola súa forma aparente. Poderíamos atopala no medio da constelación do Cisne a uns 5 000 anos luz de distancia. Nos catálogos aparece coa denominación NGC6888.

A imaxe tirouse uns vinte quilómetros ao norte da cidade de Ourense o pasado mes de xullo. Precisou amorear a información de 136 imaxes tiradas cun telescopio Celestros C8.